काठमाण्डौँ, २० असोज (जागरण) । पाँच देशीय टी–ट्वान्टी अन्तर्राष्ट्रिय क्रिकेट सिरिजमा नेपालले हङकङलाई पराजित गरेको छ । सिरिज अन्तर्गत आफ्नो पहिलो खेलमा नेपालले आज हङकङलाई ४ विकेटले हराएको हो ।
अल अम्रेट क्रिकेट मैदानमा हङकङले दिएको १ सय २६ रनको लक्ष्य नेपालले एक ओभर बाँकी छँदै ६ विकेट गुमाएर पुरा गर्यो । यसअघि, टस हारेर पहिले ब्याटिङ गरेको हङकङले २० ओभरमा ६ विकेट गुमाएर १ सय २५ रन बनाएको थियो । जितसँगै नेपालले १ खेलमा २ अंक जोडेको छ र, नेपाल तालिकाको दोस्रो स्थानमा छ ।
हङकङले २ खेलमा अंक जोड्न सकेको छैन । पुछारको हङकङ पहिलो खेलमा ओमानसँग ७ विकेटले पराजित भएको थियो । अब नेपालले दोस्रो खेलमा नेदरल्याण्डसँग भोली सोमवार खेल्नेछ ।
यस्तै आयरल्याण्डसँग असोज २२ र अन्तिम खेलमा नेपालले ओमानसँग असोज २३ गते खेल्नेछ । ओमान क्रिकेटले आयोजना गरेको सिरिजमा नेपाल, आयोजक ओमान, हङकङ, नेदरल्याण्ड र टेष्ट राष्ट्र आयरल्याण्ड रहेका छन् ।
