सुर्खेत, ३० वैशाख (जागरण) । नेपाली कांग्रेसका वरिष्ठ नेता रामचन्द्र पौडेलले विगतमा कांग्रेसले पाएको धक्काबाट ब्युँझिएर संगठित भई अघि बढ्ने बेला आएको बताउनुभएको छ ।
सुर्खेतको वीरेन्द्रनगरमा कार्यकर्ता भेटघाट कार्यक्रममा बोल्दै उहाँले पछाडि पर्नुको कारण खोजेर कांग्रेस अब अगाडि बढ्नुपर्ने बताउनुभएको हो ।
नेता पौडेलले कांग्रेस अब मिलेर अघि बढ्नुको विकल्प नभएको भन्दै विगतमा भएका कमजोरीबाट पाठ सिकेर कांग्रेस सुध्रिनैपर्ने बताउनुभएको छ ।
नेता पौडेलले कांग्रेसले राष्ट्रियता जोगाएको भन्दै यो कुरा जनतालाई बुझाउन नसक्नु आफुहरुको कमजोरी भएको स्पष्ट पार्नुभयो ।
फरक प्रसंगमा नेता पौडेलले भारतीय प्रधानमन्त्री मोदीको भ्रमणबाट देशले केही पनि लिन नसकेको टिप्पणी पनि गर्नुभयो । कार्यक्रममा बोल्दै कांगे्रस सहमहामन्त्री डाक्टर प्रकाशशरण महतले कार्यकर्ताहरुलाई निराश नहुन भन्दै संगठन निर्माणमा लाग्न आग्रह गर्नुभयो । जनतासामु आफुहरुको काम र ईतिहास लगेर जानुपर्ने भन्दै उहाँले कांग्रेसको गुमेको शाख अवश्य फिर्ता आउने बताउनुभयो ।