सुर्खेत ९ बैशाख (जागरण) । कर्णाली प्रदेशसभाको विद्यायन समितिका अध्यक्ष दानसिंह परियारले पर्यटन क्षेत्रबाटै कर्णालीको समृद्धि संभव रहेको बताउनुभएको छ ।
मोनालिसा मिडिया मुगुले बुधबार वीरेन्द्रनगरमा आयोजना गरेको कर्णाली प्रदेशको सांस्कृतिक पर्यटन प्रबद्र्धनमा पत्रकारहरुको भूमिका विषयक अन्तरक्रिया कार्यक्रममा बोल्दै परियारले यस्तो बताउनुभएको हो । कर्णालीमा प्राकृति र सांस्कृतिक हिसाबले थुप्रै पर्यटकीय संभावना भएको भन्दै यसको उचित विकास गरे पर्यटनकै माध्यामबाट कर्णालीका जनताको समृद्धि संभव रहेको उहाँको भनाइ छ । प्रकृतिले उपहार स्वरुप दिएका सम्पदालाई प्रचार प्रसारगरी पर्यटक भित्र्याउनका लागि पत्रकारहरुको महत्वपूर्ण भूमिका हुने पनि उहाँले बताउनुभयो । कार्यक्रममा आयोजक मोनालिसा मिडियाका बसन्त वागचनले कर्णालीको सांस्कृतिक पर्यटनको उजागर गर्नका लागि पत्रकारहरुको भूमिका महत्वपूर्ण हुने बताउनुभयो । सांस्कृतिक पर्यटनको प्रचार प्रसारका लागि आउँदा दिनहरुमा पनि विभिन्न कार्यक्रम गर्ने योजना रहेको वागचनले बताउनुभयो ।