पहिरोका कारण ठाउँ–ठाउँमा सडक अवरुद्ध, आवतजावत गर्नै समस्या

गणेश बहादुर खड्का, रेडियो सौर्यदय
मुगु, २७ साउन (जागरण) । अविरल वर्षाका कारण आएको बाढि पहिरोले मुगुका विभिन्न सडकखण्डमा आवत जावतमा समस्या भएको छ ।
वर्षाका कारण जिल्ला भरबाट सदरमुकाम जोड्ने मुख्य सडकहरुमा पहिरो जाँदा सदरमुकाम तथा स्थानीय क्षेत्रमा आवतजावत गर्न समस्या सिर्जना भएको हो ।
खत्याड गाउँ पालिकाको पैंखु पानी देखि निगालीबोट सम्म दर्जनौं स्थानमा पहिरो जाँदा नागरिकलाई आवत जावतमा समस्या भएको छ । वर्षाका कारण नाग्म गमगढी सडक अबरुद्ध भएको छ भने जुम्ला गोठिज्युउला देखि मुगुको गम्था सम्मको सडक यातायात समेत हप्तौँ देखि अबरुद्ध भएको छ ।
त्यस्तै मुगु सदरमुकाम गमगढी देखि धैन धुलाचौर सडक खण्ड अन्तर्गत रारा कच्चे सम्मको १७ किलोमिटर सडकमा समेत ठाउँ ठाउँमा पहिरो खस्दा नागरिकलाई आवत जावतमा समस्या उत्पन्न भएको छ ।
पहिरोका कारण सदरमुकाम गमगढी र उत्तरी सोरु गाउँपालिका साविकका सात गाविस बिच आवत-जावतमा कठिनाई भएको साविकको फोतु गाविस लिब्रु गाउँका अंगबहादुर शाहीले गुनासो गर्नुभयो ।
त्यस्तै गमगढी नाक्चे लाग्ना सडक खण्डको छाईल गाउँसम्म खनिएको १६ किलोमिटर सडक समेत वर्षाका कारण ठाउँ ठाउँमा भत्किए पछि आवत जावतमा निकै समस्या भएको छ ।
यति वेला तिब्बतसंगको नाका खुल्ला भएको र मुगुका स्थानीयवासी र तिब्बती विच व्यापारिक कारोवार हुने तथा व्यापारिक सामान आयात निर्यातका लागि घोडा, खच्चड, चौँरी लैजाने भए पनि वर्षातका कारण बाटो भत्किँदा हिँडडुल गर्न समस्या भईरहेको मुगुम कार्मारोङ्ग गाउँपालिका पुलुका स्थानीयवासी गुरुछोर्देन लामाले बताउनुभयो ।
सदरमुकाम गमगढी नाग्म सडक खण्ड अन्र्तगत गमगढी झ्यारीसम्मको सडक बन्द छ भने वर्षाकै कारण गमगढी पिनासम्मको सडकमा ठाउँ ठाउँमा पहिरो जाँदा आवत जावतमा समस्या भएको छ । ताल्चा विमान स्थलको नहरबाट आएको वर्षाको पानीले छायानाथ रारा नगरपालिका वडा नम्बर ४ र ५ का करिब पाँच सय घर धुरी रहेका वस्ती जोखिममा परेका छन् भने खेती योग्य जमिन पनि बगाएको छ ।
यता, गमगढी नाग्म सडक खण्ड अन्र्तगत सदरमुकाम गमगढी स्थित नेपाली सेनाको सदरमुकाम सुरक्षा वेश क्याम्प देखिको सडकको ढल जिल्ला अस्पताल माथी तुडुखोलामा मिसाईँदा जिल्ला अस्पताल र आसपासका वस्ती तथा खेति योग्य जमिन, छायानाथ रारा नगरपालिका वडा नम्बर ३ ईमा गाउँसँगै खेति योग्य जमिन समेत पहिरोको उच्च जोखिममा परेका छन् ।