दैलेख, २० चैत (जागरण) । दैलेखको आठबीस नगरपालिका–८ स्याउलीकाँधबाट छेपाडीतर्फ जाँदै गरेको जिप दुर्घटना हुँदा ५ जना गम्भीर घाइते भएका छन् ।
भे १ च २१४८ नम्बरको जिप सोमबार राति करिब साढे ८ बजे दुर्घटना हुँदा वडाध्यक्षसहित ५ घाइते भएका हुन् ।
जिप दुर्घटनामा परी आठबीस नगरपालिका–९ का वडाध्यक्ष धनबहादुर सिँजापती गम्भीर घाइते हुनुभएकाे छ ।
दुर्घटनामा गम्भीर घाइते अन्य यात्रुहरुमा लालबहादुर बडुवाल, नवीन बडुवाल, सूर्यबहादुर बडुवाल र कमल बडुवाल छन् । उनीहरु आठबीस नगरपालिका–९ का हुन् । प्रहरीका अनुसार, उनीहरुको टाउको, आँखा र मुखमा गम्भीर चोट लागेको छ ।
सडकबाट जिप धेरै तल खसेकाले घाइतेको अवस्था गम्भीर रहेको जिल्ला प्रहरी कार्यालय दैलेखले जानकारी दिएको छ । घाइतेको उपचारका लागि प्रदेश राजधानी सुर्खेत ल्याईएको छ ।