सुर्खेत, १३ भदौ (जागरण) । सुर्खेत ल्याएर गाइहरु भिरबाट खसाल्ने काममा संलग्न पाँच वटा ट्रक र त्यसका चालकलाई प्रहरीले नियन्त्रणमा लिएको छ । प्रहरीले चौपाया छोडेर बाँकेको नेपालगञ्जतर्फ फर्कँदै गरेका पाँच वटा ट्रक र चालकलाई बबईमा नियन्त्रणमा लिएको हो ।
बाँकेको नेपालगञ्जबाट ल्याइएका छाडा चौपाया सुर्खेतको वीरेन्द्रनगरमा मृत भेटिएका छन् । नेपालगञ्जको कान्जी हाउसबाट ल्याइएका दुई सय ९१ गाई मध्ये वीरेन्द्रनगर–८ स्थित कटकुवा जंगलमा २३ वटा मृत अवस्थामा भेटिएका हुन् ।
जिल्ला ट्राफिक प्रहरी कार्यालय सुर्खेतका प्रमुख प्रहरी निरीक्षक उदयसिंह सिजापतिकाअनुसार आठ वटा ट्रकमा ल्याइएका गाइहरु आज बिहान कटकुवा जंगलमा छोडिएका थिए ।
कटकुवा जंगलमा फेला परेका मध्ये एक सय ५० भन्दाबढी चौपायाहरु घाइते अवस्थामा छन् । गयराति साढे १२ बजेतिर चौपाया बोकेका आठ वटा ट्रक सुब्बाकुना प्रहरी चौकीमा इन्ट्री भएको देखिन्छ ।
फोटोः सूर्यप्रकाश कँडेल ।
