सुर्खेत, ८ मंसिर (जागरण) । कर्णाली प्रदेशसभाका सदस्य एवं नेकपा नेता यमलाल कँडेलले प्रदेशसभा सचिवालयले उपलब्ध गराएको गाडीको मर्मत कार्यमा आफ्नो कुनै संलग्नता नभएको बताउनुभएको छ । सामाजिक सञ्जाल फेसबुकमार्फत नेता कँडेलले व्यक्तिगत लाञ्छाना लगाउने गरी सम्प्रेषित समाचारप्रति गम्भीर ध्यानाकर्षण भएको जनाउनुभयो । ‘मैले नै मर्मत सम्भार गरी बिल पेश गरेको जस्तो गरी समाचार सम्प्रेषित गरिएको छ, जुन तथ्यमा आधारित छैन’, उहाँले फेसबुक स्टाटसमा लेख्नुभएको छ, ‘गाडी मर्मत गर्ने तथा बिमाको प्रक्रिया अघि बढाउने काम प्रदेशसभा सचिवालयको हो ।’
प्रदेश मन्त्रिपरिषद् निर्णयमा आधारमा प्रदेशसभा सचिवालयले नेता कँडेललाई बा २ झ ३९७० नम्बरको गाडी उपलब्ध गराएको थियो । उक्त गाडी जेठ ६ गते काठमाडौं जाने क्रममा चितवनमा दुर्घटनामा परेको थियो । गाडी मर्मत प्रदेशसभा सचिवालयले गरिरहेको छ । नेता कँडेललाई उपलब्ध गराइएको गाडी सुविधासम्बन्धी विषयमा महालेखा परीक्षकको प्रतिवेदनले बेरुजु देखाएपछि उहाँले गाडी सुविधा नलिने घोषणा गर्नुभएको छ । प्रदेशसभा सचिवालयलाई पत्र लेख्दै उहाँले प्रदेशसभा सदस्यका हैसियतमा कानून बमोजिमबाहेक अन्य सुविधा प्रदान नगर्न आग्रह गर्नुभएको थियो ।