सुर्खेत,१८ जेठ।
सुर्खेतको चिङ्गाड गाउँपालिकामा सामाजिक सुरक्षा भत्ता बुझ्नका लागि डोकोमा बोकेर लगिएका एक बृद्धको भीरबाट लडेर मृत्यु भएको छ ।
वडा नं. २ काफलकाँडाका नन्दवीर खड्काको सामाजिक सुरक्षा भत्ता बुझेर फर्किदै गर्दा मृत्यु भएको वडा अध्यक्ष प्रेमबहादुर खड्काले जानकारी दिए । वडाअध्यक्ष खड्का अनुसार अन्दाजी ८०÷८५ बर्षिय खड्कालाई वडा नं. ३ स्थित ठाँटी बजारमा रहेको सानीमा बैंकको शाखामा भत्ता बुझ्नका लागि उनका छोराहरुले डोकोमा बोकेर लगेका थिए । घर फर्किनेक्रममा बुधबार दिउसो करिब तीन बजेतिर चिङ्गाड खोलाको राजीकुना भन्ने ठाउँमा बोक्ने व्यक्ति (छोरा)को खुट्डा चिप्लिदा दुबै जना लडेका थिए । बृद्ध खड्काको घटनास्थलमै मृत्यु भएको र छोरालाई भने सामान्य चोट पटक लागेको वडा अध्यक्ष खड्काले जानकारी दिए ।
गाउँपालिका अध्यक्ष बोधविक्रम जिसीले गाउँपालिका भौगोलिक हिसाबले विकट भएकाले सामाजिक सुरक्षा बुझ्न बैंक सम्म आइपुग्ने नागरिकहरुले सास्ती खेप्नु परेको बताए । सम्बन्धित वडाबाटै भत्ता वितरणका लागि चाँडैले बैंकसंग छलफल गर्ने अध्यक्ष जिसीको भनाइ छ ।